កាលពីរាត្រីថ្ងៃទី ១២ ខែមីនា ឆ្នាំ ២០២៣ កន្លងទៅ មហាជននិយមតាមដានបណ្តាញសង្គមហ្វេសប៊ុក និង Tik Tok ច្បាស់ជាបានជ្រាបមកហើយពីវីដេអូអ្នកកាន់កាមេរ៉ាម្នាក់ត្រូវបានធ្លាក់ពីលើឆាក ស្របពេលកំពុងថតទិដ្ឋភាពការ Live ផ្ទាល់កម្មវិធីប្រគំតន្ត្រីមួយ ដែលជាពេលរបស់លោក គូម៉ា កំពុងតែច្រៀង។
វីដេអូនោះ ត្រូវបានបន្តចែកចាយ និង មានការរិះគន់យ៉ាងចាស់ដៃដល់តារាចម្រៀង គូម៉ា ថាឃើញអ្នកកាន់កាមេរ៉ាធ្លាក់ពីលើឆាកហើយ ហេតុអ្វីលោកណៅបន្តការច្រៀង ដូចគ្មានរឿងអ្វីកើតឡើងយ៉ាងដូច្នោះ?
ព្រឹកបន្ទាប់ក្រោយថ្ងៃកើតហេតុ លោក គូម៉ា ក៏បានចេញមុខមកស្រាយច្បាស់ៗដែរថា ៖ «លោកក៏មានបំណងបម្រុងនឹងជួយបងប្រុស Camera ដែរ តែដោយសារភ្លាមនោះ ក្រុមការងារ ៤ ទៅ ៥ នាក់ បានរត់បានជួយគាត់ ហើយក្រុមការងារបានប្រាប់ឱ្យលោកបន្តការច្រៀង លោកក៏បន្ត ហើយចប់ការច្រៀងភ្លាមលោកក៏បានទៅសួរសុខទុក្ខបងប្រុសកាមេរ៉ា និង បានជូនជាថវិកាដល់គាត់សម្រាប់ព្យាបាលខ្លះដែរ»។
លើសពីនោះ ក្រុមការងារថត និង អ្នកគ្រប់គ្រងផលិតកម្មហ្គាឡាក់ស៊ី ណាវ៉ាត់ត្រា ដែលមានវត្តមាននៅទីតាំងនោះ ក៏បានចេញមកបកស្រាយដូចគ្នានឹងលោក គូម៉ា ថែមទាំងបានអរគុណដល់ទឹកចិត្តលោក គូម៉ា ដែលបានព្រួយបារម្ភយកចិត្តទុកដាក់អ្នកកាន់កាមេរ៉ារូបនោះដែរ។
ជាការពិត បើទោះជាមានការចេញមុខមកបកស្រាយរួចរាល់ហើយក្តី តែលោក គូម៉ា ក៏នៅតែរងការរិះគន់ជាបន្តបន្ទាប់ពីសំណាក់មហាជនមួយចំនួនតូចនៅឡើយ ដោយថាលោកគឺជាមនុស្សគ្មានចិត្តជួយគ្នាសោះ។
យ៉ាងណាមិញ ងាកទៅកាន់អ្នកកាន់កាមេរ៉ាដែលបានធ្លាក់ពីលើឆាករូបនោះ ក្រោយឃើញមហាជនបន្តការស្តីបន្ទោសដល់លោក គូម៉ា លោកក៏បានចូលទៅបញ្ចេញមតិខាងក្រោមវីដេអូបកស្រាយរបស់លោក គូម៉ា ដោយសុំមហាជនកុំឱ្យបន្ទោសដល់តារាចម្រៀងរូបនេះទៀតថា ៖ «ខ្ញុំបាទជា Camera man ដែរធ្លាក់ឆាកហ្នឹង។ ខ្ញុំអត់អីទេបងប្អូន គ្រាន់តែនៅចុកកន្លែងដែលត្រូវតិចតួចទេ។ បងប្អូនកុំបន្ទោសបង គូម៉ា អី។ ទាំងខ្ញុំ និង ក្រុមការងារ និង បង គូម៉ា នឹកស្មានមិនដល់ ស្រមៃមិនឃើញទេថាមានរឿងហ្នឹងកើតឡើង។ ពេលធ្លាក់ហ្នឹង ក្រុមការងារគាត់បានមកជួយខ្ញុំទាន់ពេលវេលា រួចហើយបង គូម៉ា ច្រៀងចប់ភ្លាមគាត់បានមកមើលខ្ញុំភ្លាម សួរសុខទុក្ខខ្ញុំ រួចគាត់ទៅប្ដូរសម្លៀកបំពាក់រួចក៏មកមើលខ្ញុំម្ដងទៀត ហើយគាត់ក៏បានជូនថាវិកាដល់ខ្ញុំដែរ។ សូមអរគុណបងប្អូនទាំងអស់ដែលខមមិនការអាណិតស្រឡាញ់មកខ្ញុំ! បង គូម៉ា គាត់ពិតជាចិត្តល្អណាស់ (idol Kuma)»៕ អត្ថបទ៖ ប្រជាប្រិយ
សូមទស្សនាវីដេអូខាងក្រោម៖
