ជុំវិញវិញប្រធានបទ «អ្នកមានអ្នកក្រ» មកដល់ពេលនេះ លើបណ្ដាញសង្គមហាក់នៅតែជាប្រធានបទដ៏ក្ដៅគគុកដដែល ដោយមហាជនអ្នកលេងបណ្ដាញសង្គមបន្តផ្ទុះការវែកញែកខ្លាំងជាបន្តបន្ទាប់។
ក្រោយផ្ទុះប្រតិកម្មវែកញែកកាន់តែខ្លាំងពីសំណាក់មហាជន នៅថ្ងៃទី ៤ ខែមេសា ឆ្នាំ ២០២៣ កន្លងទៅនេះ អ្នកស្រី តាំង ហ្គិចលៀង ក៏បានចេញមកបង្ហោះសារយ៉ាងវែងក្នុងន័យសុំអភ័យទោស និង បានស្នើដល់មហាជនទាំងអស់ឱ្យឈប់វែកញែកបន្តទៀតលើរឿងនេះ។ ជាមួយគ្នានោះ អ្នកស្រីក៏ប្រកាសដាក់ពាក្យបណ្តឹងនៅនាយកដ្ឋានប្រឆាំងបទល្មើសបច្ចេកវិទ្យា នៅក្រសួងមហាផ្ទៃផងដែរ ចំពោះអ្នកដែលបានលួចក្លែងបន្លំផេគរបស់ខ្លួន។
យ៉ាងណាមិញ ក្រោយការបង្ហោះសារសុំទោសហើយ ស្រាប់តែនៅថ្ងៃទី ០៥ ខែមេសា ឆ្នាំ ២០២៣ នេះ ក៏បានបែកធ្លាយសារជាសំឡេងរបស់អ្នកស្រី តាំង ហ្គិចលៀង មួយផ្សេងទៀតទំនងជាការសន្ទនានៅក្នុងក្រុមមួយ ដោយអ្នកស្រីបានអរគុណដល់សមាជិកក្នុងក្រុមនៃការព្រួយបារម្ភ ព្រមទាំងរៀបរាប់នូវពាក្យពេចន៍ក្តៅគគុកជាច្រើនទៀត ធ្វើឱ្យមហាជនកាន់តែផ្ទុះប្រតិកម្មខ្លាំងឡើង។
អ្វីដែលកំពុងតែធ្វើឱ្យមហាជនចាប់អារម្មណ៍ខ្លាំងលើសារសំឡេងរបស់អ្នកស្រី តាំង ហ្គិចលៀង គឺត្រង់ការលើកឡើងថា រឿងដែលកំពុងកើតឡើងលើអ្នកស្រី កំប៉ិកកំប៉ុក តូចតាចអត់បានការ និង មានពាក្យធ្ងន់ស្រាលជាច្រើនទៀត។
ជាមួយសារសំឡេងបែកធ្លាយនោះដែរ គេមិនបានដឹងថាជាការកាត់ត ឬ បែកធ្លាយចេញពីប្រភពណានៅឡើយ តែបើងាកទៅកាន់អតីតតារាស្រី ឈិន សុធារី ក្រោយឮសារំឡេងបែកធ្លាយនោះហើយ ក៏ហាក់នៅមិនស្ងៀម និង មានប្រតិកម្មយ៉ាងខ្លាំង រហូតបានបង្ហោះសាររៀបរាប់ថា ៖ «ហេតុអ្វី យកសង្គមមកឱ្យដោះស្រាយជំនួស? ហេតុអ្វី យកសង្គមមកបិទបាំងនូវទង្វើរបស់ខ្លួន? អ្នកណាជាបុគ្គលពិតប្រាក ដែលជាអ្នកសាង? សុំសួរបងស្រី! សម្តីប្រជាពលរដ្ឋ ដែលបងមើលស្រាលថាត្រឹមតែគីឡូស្រាលៗ នេះសបញ្ជាក់ច្បាស់ណាស់ បងស្រីមានចេតនានៅតែមិនឱ្យតម្លៃអ្នកទន់ខ្សោយ អ្នកខ្សត់ខ្សោយជាងខ្លួន។
បងថាបងប្អូនខ្មែរយើង ប្រជាជនមានគីឡូស្រាលណាស់ថាមិនឈឺទេ! តែកុំភ្លេចថាសម្តីរបស់បងស្រីកន្លងមកធ្វើឱ្យមហាជនទូទាំងប្រទេសធ្វើឱ្យប្រជាជនប៉ះពាល់សតិអារម្មណ៍របស់ពួកគាត់ខ្លាំងដល់កម្រិតណា? រហូតកក្រើកដល់សម្តេចតេជោ បងស្រីថាសម្តីប្រជាជនគីឡូស្រាល ចុះសាររបស់សម្តចពុកវិញគីឡូស្រាលដែលឬ?
ទី ២ បងស្រីគួរតែមើលបណ្តាញសង្គមម្តងទៀត តាមរយៈសារព័ត៌មាន និង ប្រតិកម្មរបស់ប្រជាជនទូទាំងប្រទេស មិនមែនដូចបងស្រីនិយាយថា មានមនុស្សមួយចំនួនតិចដែលអវិជ្ជមានមកលើបង រីឯមនុស្សភាគច្រើនគឺមានទស្សនៈវិជ្ជមានមកលើបងស្រី បងនិយាយនេះតាមខ្ញុំស្ទង់អារម្មណ៍បង គឺបងកំពុងតែនិយាយកុហកខ្លួនឯងច្រើនជាង។ ចំនួនប្រជាជនធម្មតាៗ គីឡូស្រាល និង ថ្នាក់ដឹកនាំមួយចំនួនរហូតផ្អើលដល់ព្រះឥន្ទ ហើយនៅបងស្រីអាចវាចារពោលពាក្យបែបនេះទៀត។
ការពិតរឿងបានត្រូវចប់ដោយអនុសាសន៍សាររបស់សម្តេចពុករួចហើយថា ត្រូវបំភ្លេចចោល តែនៅមានសំឡេងចេញចរិតពិតបងស្រីចេញមកទៀត នេះគឺនាងខ្ញុំសុំបញ្ចេញមតិម្តង។ មនុស្សធ្វើខុសចេះសុំទោសជារឿងល្អបំផុត តែបើសុំទោសដោយមិនចេញពីចិត្តដើម្បីតែមុខមាត់ក៏វាគ្មានន័យអ្វីនោះដែរ! គេមិនខ្លាចបំផុតមនុស្សដែលធ្វើជាដេកលក់»៕ អត្ថបទ៖ ប្រជាប្រិយ
